Со францускиот филм „Да се биде укажувач“, започна првиот истражувачки филмски фестивал во Скопје. По документарниот филм во кој се раскажува приказната за французинот Рафаел Але кој е главниот „виновник“ за откривањето на аферата „Луксликс“ на сцената во Кино Култура новинарката на НОВА ТВ, Сашка Цветковска ја модерираше дебатата „Укажувачи – ’тајни’ играчи кои можат да ја променат историјата“.
На дебатата учествуваа, Ѓорѓи Лазаревски – македонскиот укажувач кој овозможи јавноста да дознае како претходната влада на ВМРО-ДПМНЕ масовно ги прислушувала своите граѓани, легендарната американска новинарка Бети Медсгер која во 1971 година ги објави анонимно доставените документи кои беа украдени од канцеларија на ФБИ, Алесија Черантола и Беноа Бринже, истражувачки новинари кои беа дел од тимот репортери што работеше на истражувачката сторија „Панамските документи“, која ја освои Пулицерова награда, младата адвокатка Павлина Зефиќ и Денис Ампев, активист кој работи на подигање на свеста н текстилните работници преку културата и уметноста.
Лазаревски, на дебатата рече дека истрагата за случајот „Пуч“ во кој беа обвинети Лазаревски, Ѕвонко Костовски, Зоран Верушевски и сегашниот премиер Зоран Заев, не ја воделе обвинителите, туку на многу повисоко ниво.
„Кога имате таков обвинител кој мисли дека знае се, смислија сценарио кое беше провидно и кое веднаш падна во извештајот на Прибе. Се беше јасно“, рече Лазаревски.
Тој раскажа дека во МВР отишол како гостин на негово барање за да се утврди врската со Зоран Верушевски и да соопшти дека ги имаат доказите за незаконското прислушување
„На средбата наеднаш излезе од соседната просторија поранешниот началник на Петтата управа, Горан Грујевски, кој викаше „Не е точно, не е точно“. Го поминав целиот ден таму и пиев само вода, но се чувствував ослободено. Потоа нѐ обвинија за шпионажа и нѐ притворија, а ние самите баравме прием и пријавивме МВР“, рече Лазаревски.
Денеска и утре на фестивалот ќе се одржат дебати, работилници и ќе се гледаат филмови.
Новинарката Кристина Озимец од Платформата за истражувачко новинарство и анализи ПИНА, која е еден од организаторите на фестивалот најави дека Истражувачкиот филмски фестивал во Скопје претставува настан на кој може да се најдат филмови, дебати и работилници на разни теми од областа на новинарството и медиумите.
Таа вели дека кога пред неколку месеци со неколку колешки и ентузијасти ја формирале ПИНА, со цел да придонесе во подобрување на состојбата на истражувачкото новинарство, како и за унапредување на состојбата на жените новинарки во медиумите, не постоела идејата за фестивалот туку само идејата за формирање и развој на нивниот медиум – pina.mk, како една платформа каде ќе може да се најдат истражувачки стории и анализи на разни теми.
„Низ целиот процес се наметнаа и искуствата кои ги стекнав во праксата во САД во една организација за истражувачко новинарство како и посетите на слични фестивали во САД и Европа, со што полека започнав да размислувам дека е можеби добра идеја да се организира нешто слично кај нас, секако прилагодено на нашите услови. Фестивалот годинава опфаќа теми како ситуацијата со свиркачите, феноменот на лажни вести, корупцијата, еколошката ситуација и загадувањето во земјава и многу други теми. Со овој пристап се надеваме дека фестивалот освен што ќе биде интересен за новинарите и медиумската заедница, ќе биде привлечен и за пошироката публика, што за среќа се покажа како точно после вчерашното отворање на фестивалот во полна сала во Кино Култура“, вели Озимец.