Синдикатот на македонската дипломатска служба остро реагира на посетата на Курц
Синдикатот на македонската дипломатска служба остро реагираше на посетата на австрискиот министер за надворешни работи на партискиот митинг на ВМРО-ДПМНЕ.
„Со огромно разочарување ја примивме веста дека австрискиот министер за надворешни работи, Себастијан Курц, си дозволил грубо да ја прекрши дипломатската практика и во соработка со македонскиот министер за надворешни работи, г. Никола Попоски, да ја доведат македонската јавност во сериозна заблуда за карактерот на престојот во Македонија на австрискиот партиски функционер.“, се вели во соопштението на Синдикатот.
Синдикалците велат дека кокетирањето на државното со партиското е светски процес, но крајно поразувачко е тоа што оваа ситуација дошла од Австрија.
„Извесно е дека прво и основно тој се појавил на партиски митинг, па дури потоа се „преоблекол“ во државничко руво и – станал министер!?? Тоа е недопустливо во дипломатската практика. Партискиот функционер не е дипломат и заради тоа е недопустливо да се крие зад дипломатски пасош. И, не постои обврска од страна на земјата на приемот да го прими партискиот функционер во посета на нејзината територија“, пишува во соопштението.