Украина втора ноќ по ред ја нападна Москва со беспилотни летала,соопштија утринава руското Министерство за одбрана и градоначалникот на Москва, Сергеј Собјанин.
Руското Министерство за одбрана соопшти дека нејзината воздушна одбрана во текот на ноќта уништила 17 украински беспилотни летала, вклучувајќи и едно што летало кон Москва и 13 над Калушкиот регион, што на североисток се граничи со Московскиот регион.
Градоначалникот на Москва, пак, на каналот Телеграм соопшти дека службите за итни случаи се испратени на местото каде што паднал дронот што летал кон Москва.
Нема извештаи за штети, но Русија ретко ги открива сите последици од украинските напади врз нејзината територија, освен ако не се засегнати цивили или цивилни објекти.
Руските единици за воздушна одбрана ги уништија преостанатите три беспилотни летала над Брјанскиот регион, што се граничи со Украина на запад и Калуга на североисток.