Собраниските служби го известиле претседателот Ѓорге Иванов дека до истекот на рокот, ноќеска на полноќ, мандатарот Никола Груевски, не поднел ни предлог за состав за нова Влада, ни програма.
Генералниот секретар на Собранието попладнево испратил допис до Кабинетот на Иванов во кој го информира со фактичката состојба, соопштија попладнево од собраниската прес-служба.
Претходно, Претседателот Иванов попладнево се сретна со евроамбасадорот Самуел Жбогар кој ги пренел ставовите на Европската унија за актуелната политичка ситуација во земјава. Кабинетот на претседателот соопшти дека Иванов му пренел на Жбогар дека по добивањето на официјално известување од Собранието, ќе почне консултации со надлежните институции и политичките партии.