Согласно Пржинскиот договор, изборот на преодната влада која ќе ги организира изборите на 11.декември треба да биде точка на дневниот ред на денешната седница на Собранието на Република Македонија.
Според договорот, опозицијата треба да ги добие министерските места во секторите внатрешни работи и труд и социјална политика, како и дополнителни заменици министри за финансии, информатичко општество и администрација и за земјоделство.
СДСМ соопшти дека на овие позиции ќе бидат истите лица и од претходната преодна влада – Оливер Спасовски за министер за внатрешни работи, Фросина Ременски е кандидатка за министерка за труд и социјална политика, Кире Наумов кандидат за дополнителен заменик министер за финансии, Александар Кирацовски кандидат за дополнителен заменик министер за информатичко општество и администрација и Љупчо Николовски кандидат за дополнителен заменик министер за земјоделство, водостопанство и шумарство.
Денеска, 100 дена пред изборите, на функцијата одговорен уредник на МРТВ треба да биде назначена Санта Аргирова. Нејзиниот мандат ќе трае до крајот на изборниот процес.