Собранието на Република Македонија денеска треба да гласа по предлогот на Владата, Љубомир Јовески да биде новиот државен јавен обвинител.
Владата на 7 ноември му предложи на Собранието за јавен обвинител на Република Македонија да биде именуван Љубомир Јовески, член на Советот на јавни обвинители.
На огласот што го распиша Владата на 14 септември за државен јавен обвинител се пријавија 23 кандидати. По пријавувањето на кандидатите, Советот на јавните обвинители, на барање на Владата, и достави образложено мислење во писмена форма за сите пријавени кандидати на огласот што ги исполнуваат условите. Мислењето на Советот е обврзувачко за Владата, која пак предложените кандидати ги доставува до Собранието.
Кој е Јовески
Шеесет и тригодишниот Љубомир Јовески е предлог на Владата за нов државен јавен обвинител. Во судството е уште од 1979 година, кога станува приправник во Секретаријатот за правосудството на Социјалистичка Република Македонија.
Бил судија во Општинскиот суд, во Основниот суд Скопје 2, а во 2003 година е избран за заменик јавен обвинител.
Името на Љубомир Јовески ретко се споменуваше во јавноста, се до моментот кога беше посочен како еден од можните кандидати за наследник на Марко Зврлевски.
Јовески во својот имотен лист доставен до Антикорупциската комисија навел дека поседува стан во Скопје од 51 квадратни метри во вредност од 38.000 евра. Вози Рено Меган, а поседува и Југо старо 19 години. Во банка има 7.000 евра и трансакциска сметка од 10.000 денари. Но, има и долгови, односно кредитна картичка со минусно салдо од 150.000 денари.
Во моментот го довршува својот двегодишен мандат во Советот на јавните обвинители, а претходно бил еден од десетината заменици на Зврлевски.
За да биде избран од Собранието на РМ за Јовески треба да гласаат 61 пратеник. Мандатот на Јавниот обвинител на Република Македонија е шест години.
Лилјана Спасевска, ја извршува оваа функција, откако Марко Зврлевски беше разрешен на 17 август.
Повеќе точки на денешната седница
На дневен ред на денешната седница се измените на Законот за заштита на сведоци, што ги бараше Специјалното јавно обвинителство, со кои на ова обвинителство треба да му се овозможи да одлучува кој ќе биде заштитен сведок во постапките што се под негова надлежност.
На седницата ќе се расправа и за измените на Законот за Судскиот совет, за престанок на важењето на Законот за Советот за утврдување факти и поведување постапка за утврдување одговорност за судија, за измените на Законот за пензиското и инвалидското осигурување, за здравственото осигурување, за Законот за придонеси од задолжително социјално осигурување и за измените на Законот за акцизите, сите по скратена постапка.