Во Собранието денеска почнува расправата по дополнетиот Предлог-буџет за 2020 година кој ги содржи 12-те прифатени амандмани од Комисијата за финансирање и буџет во чиј фокус се инвестиции во човечкиот капитал.
Приходите во Предлог-буџетот за 2020 година се проектирани на 222 милијарди и 300 милиони денари, односно 3,615 милиони евра, што претставува раст од 5,6 отсто споредено со оваа година. Кај расходната страна на буџетот планиран е раст од пет отсто во однос на 2019 година со што вкупните расходи ќе изнесуваат 239 милијарди и 700 милиони денари, односно 3,898 милиони евра.
Буџетскиот дефицит за 2020 година е предвиден на ниво од 2,3 отсто од БДП, што е пониско од нивото за оваа година (2,5 проценти), согласно Фискалната стратегија за периодот 2020-2022 година, како и препораките на меѓународните организации. Дефицитот е намален и во апсолутно ниво за 160 милиони денари и изнесува 17 милијарди и 385 милиони денари.
Во фокусот на буџетот за наредната година е човечкиот капитал, односно подобар здравствен, образовен и социјален систем и силна поддршка за раст на реалниот сектор. Министерката за финансии, Нина Ангеловска оценува дека инвестициите во човечкиот капитал се клучни бидејќи тие ја движат економијата и ги движат промените.
Капиталните инвестиции во буџетот се проектирани на ниво од 23 милијарди денари, а 56 отсто од вкупните буџетски расходи ќе одат во области што се потпираат на човечкиот капитал.
Проекциите во буџетот се правени врз основа на предвиден раст за следната година од 3,8 отсто од БДП, кој, пак, се базира на растот на приватната потрошувачка, извозот и јавните и приватните инвестиции. Расправaта по буџетот, согласно деловникот, треба да трае најмногу пет работни дена.