Арсенал го доби дербито за Лигата на шампиони, а Оле Гунар Солскјер, конечно, почувствува горчина на пораз во Премиерлигата. „Топчиите“ на „Емирати“ го совладаа Манчестер јунајтед со 2:0 во 30 коло и останаа на курсот за престижното натпреварување на УЕФА.
Гранит Џака во 12. минута и Пјер Емерик Обамејанг во 69. минута од пенал им пресудија на „црвените ѓаволи“ за кои ова е прв првенствен пораз од 16 декември и разделбата со Жозе Мурињо.
Но, Норвежанецот е задоволен од играта на Манчестер јунајтед во Лондон и смета дека поразот е незаслужен.
„Во изминатиот период имаше натпревари што го добивавме, а не заслуживме победа. Овојпат загубивме натпревар во кој не заслуживме пораз. Меѓутоа трите бода одат кај нив, не кај нас. Одиме натаму. Нè чека меч против Вулверхемптон во купот што е голем за нас“, рече норвешкиот менаџер на клупата на Манчестер јунајтед.
Тимот од „Олд Трафорд“ падна на петтото место на табелата со 58 бода, два помалку од Арсенал кој сега е четврти. Шансите за финиш меѓу најдобрите четири во Премиерлигата се присутни, мисија што не е невозможна во осумте кола колку што преостануваат до крај на сезоната.
„Почнавме бавно и можеби тоа беше последица на заморот од Париз. Но, и во таква ситуација креиравме шанси, имавме посед на топка, ја погодивме рамката од голот. Првиот гол секогаш го одредува текот на натпреварите, а тие имаа голман кој бранеше извонредно. Овој пораз, сепак, не треба да нè поколеба. Како поранешен напаѓач знам дека Лукаку и Рашфорд беа фантастични меѓутоа стативата, голманот или Гранит Џака нè блокираа. Секогаш се испречуваше нешто пред голот. Може да бидеме разочарани од резултатот, но никако од играта“, додаде Солскјер.
Норвежанецот застана и во одбрана на Давид де Хеа и истакна дека првиот гол не е негова грешка. За досудениот пенал од кој Арсенал го постигна вториот гол и ги запечати трите бода изрази лично мислење дека не е оти, според него, немало доволно интензитет во контактот на Фред врз Лаказет. Покрај пофални зборови за своите играчи, Солскјер не штедеше комплименти и за противничките како на пример за Бернд Лено за кого рече дека е одличен голман, а Гранит Џака го спореди со Бразилец.
Премиерлига, 30 коло
Арсенал – Манчестер јунајтед 2:0
Челзи – Вулверхемтпон 1:1
Ливерпул – Барнли 4:2
Манчестер сити – Вотфорд 3:1
Саутемптон – Тотенхем 2:1
Њукасл – Евертон 3:2
Лестер – Фулам 3:1
Кардиф – Вест Хем 2:0
Хадерсфилд – Борнмут 0:2
Кристал Палас – Брајтон 1:2
Табела: Манчестер сити 74, Ливерпул 73, Тотенхем 61, Арсенал 60, Манчестер јунајтед 58, Челзи 57 (-1), Вулверхемптон 44, Вотфорд 43, Вест Хем 39, Лестер 38, Евертон 37, Борнмут 37, Њукасл 34, Кристал Палас 33, Брајтон 33, Саутемптон 30, Барнли 30, Кардиф 28, Фулам 17, Хадерсфилд 14.