Министерството за внатрешни работи ќе испраќа СМС и е-пошта до сопствениците на возилата за прекршоци регистрирани преку системот „Безбеден град“, со линк за преземање на записникот и платниот налог, користејќи ги податоците за контакт оставени при регистрација.
Опомените за сообраќајни прекршоци отсега ќе пристигнуваат по СМС и по е-пошта, а доколку казната се плати во рок од осум дена, износот ќе биде преполовен.
Од денеска започна пробниот период на проектот „Безбедна држава“, со кој возачите што ќе направат сообраќаен прекршок ќе добиваат известување за сторената повреда на правилата.
Законот за безбедност на сообраќајот предвидува МВР да врши контрола врз возачите и врз другите учесници во сообраќајот преку непосредно набљудување, технички уреди и преку средства за снимање. Со последните измени, прекршоците ќе се документираат и преку системи за видео-надзор и автоматска детекција.
Сите прекршоци регистрирани преку системот „Безбеден град“ ќе се санкционираат согласно прописите за највисока дозволена брзина, без исклучоци – независно дали се сторени во населено место или надвор од него.
За прекршоците што ќе бидат регистрирани преку системот „Безбеден град“, МВР ќе испраќа СМС-порака и е-пошта до сопственикот на возилото. Известувањето ќе содржи линк преку кој се презема записникот за сторениот прекршок и прекршочниот платен налог. Пораките се испраќаат на контакт-податоците што сопственикот ги има оставено при регистрацијата на возилото.
Доколку сторителот ја прифати одговорноста и ја плати глобата во рок од осум дена од приемот на записникот, ќе плати само половина од изречениот износ. По истекот на тие осум дена, глобата може да се плати во целост во дополнителен рок од уште осум дена, и тоа пред покренување на постапката за присилна наплата. Ако глобата се плати навреме, не се наплатуваат трошоци за постапката.
Странците, како и македонските државјани кои патуваат во странство и би можеле да го избегнат плаќањето, мора веднаш, а најдоцна во рок од осум дена од приемот на записникот, да ја платат целата глоба. Ако тоа не го направат, МВР ја проследува обврската до надлежниот орган за присилна наплата.
Кај прекршоци за кои, покрај глобата, е предвидена и забрана за управување со моторно возило или престанок на важноста на возачката дозвола, МВР ќе поднесе барање за поведување прекршочна постапка пред надлежен суд, дури и ако глобата е платена навреме.
Глобите ќе можат да се плаќаат електронски преку линк кој ќе се добие со известувањето. Уплатницата автоматски ќе го содржи бројот на записникот и точниот износ што треба да се плати.
По извршената уплата, МВР веднаш добива електронска потврда дека глобата е платена.