Дополнително, велат надлежните, до Основното јавно обвинителство Скопје вчера беше поднесена кривична пријава и од сопственикот на наведената фирма против едно физичко и едно правно лице во врска со издавањето лажни сертификати.
Сопственикот на битолската компанија „Дака лифт“ Димче Поповски во изјава за Нова вели дека во наредните денови откако истрагата ќе утврди како се направени злоупотребите со лажните сертификати од страна на фирмата од Скопје во консултација со правните застапници ќе ги одреди и натамошните чекори затоа што и неговата компанија е оштетена. Тој вели дека станува збор за добиени 14 тендери, а не како што објави Антикорупциска 90 јавни набавки.
– „Дака лифт“ на 6 февруари прослави 30 години од своето постоење, тоа се 30 години мака, пот, успешно работење – вели Поповски кој очекува истражните органи докрај да го расветлат случајот.
Според Државната комисија за спречување на корупцијата непостоечка фирма со фалсификувани документи, фалсификувани ИСО сертификати, потписи, во периодот од 2018 до 2022 година добила тендери за монтажа и сервисирање лифтови, главно од јавни институции.
Според Антикорупциската комисија случајот бил откриен кога Градската општа болница објавила тендер, а Комисијата за јавни набавки во болницата ја проверила валидноста на ИСО сертификатите кај самиот издавач на сертификатите – фирма од Хрватска, од каде добиле одговор дека сертификатите се фалсификувани. Комисијата не ја прифатила понудата од наведената фирма, а таа вложила жалба до државната комисија од каде била одбиена како неоснована.
С.М.