Во Апелацискиот суд Скопје денеска се одржува јавна седница за првостепената пресуда за сопственикот на порталот „Доказ“, Марјан Стаменковски, со кој беше осуден на три години и еден месец затвор за повеќе кривични дела.
Седницата започна, но набргу се прекина бидејќи Стаменковски побара да се изземе обвинителот Сашо Рајчев од Вишото јавно обвинителство кое е надлежно да го застапува предметот пред второстепениот суд. Стаменковски тврди дека соработувал со Рајчев на дел од предметите за коишто му се суди, односно дека добивал информации од обвинителот.
За барањето на Стаменковски, треба да одлучи шефот на Рајчев, Хајрулахи за кој Стаменковски објавуваше текстови а денеска рече дека добивал информации токму од обвинителот Рајчев. По донесувањето на одлуката, јавната седница треба да продолжи.
Првостепената пресуда за сопственикот на „Доказ“ беше донесена на 4 април, а покрај затворската казна тој доби и парична од 5 илјади евра и забрана во наредните 10 години да врши дејствија поврзани со делата, односно да регистрира домен за интернет-портал во земјава, а сите досега регистрирани се бришат.
Стаменковски беше прогласен за виновен за пет кривични дела – две за ширење расистички и ксенофобичен материјал и едно дело: уцена, пиратерија на аудиовизуелно дело и злоупотреба на лични податоци.