Подобрување на патната инфраструктура заедно со инвестиции во транспортот сметам дека се едни од клучните сегменти на кои треба да посвети вниманиe вашата земја. Иако не сум запознаен детално со економијата, сепак, како копнена земја сметам дека транспортното прашање, заедно со работната сила и образованието се меѓу клучните сегменти на кои треба земјата да посвети поголемо вниманиe, заедно со инфраструктурата како еден од поважните сегементи.
Ова го посочи нобеловецот Пол Кругман во денешниот настап во рамки на меѓународната конференција „Скопски економски и финансиски форум – СЕФФ“.
Кругман кој е и истакнат колумнист во Њујорк Тајмс, покрај тоа што е едно од водечките имиња во економските кругови во светот вели дека иако светската економија се наоѓа во турбулентен период, сепак тој не очекува светот да ја заврши годината со рецесија, и дополни дека очекува економски раст иако, рече, е тешко да се каже какви се изгледите за тоа.
Кругман се осврна на повеќе теми во својот говор, меѓу кои и инфлацијата потенцирајќи дека истата е глобална и дека ја има и во САД и во Европа и насекаде во светот. Воедно тој се осврна и на влијанието на тековните случувања врз глобализацијата посочувајќи оти според него светот се повеќе се оддалечува од глобализацијата.
„Изгледите се дека се оддалечуваме од глобализацијата, и иако тоа се јавува како тенденција, сметам дека нема да дојде до целосно затворање на земјите. Трудоинтензивните дејности не очекувам да се вратат во развиените земји, тоа се големи инвестиции, но голема е веројатноста да се преселаат поблиску до развиените земји. Сепак, платите во земјите кои се поблиску до развиените се повисоки, но голема е веројатноста да се селат компаните од Азија во Централна америка, поблиску до САД. Додека пак за Европската унија тие што сакаат поблиску да се до Европа ќе се преселат во земји на Балканот, или во вашиот регион, иако платите тука не се ниски како во Бангладеш, но се пониски од Германија“, рече Кругман.
Добитникот на Нобелова награда за економија, американскиот професор Пол Кругман осврнувајќи се на состојбите по кризата предизвикана од пандемијата, но и од војната во Украина, истакна дека се чувствуваат последиците но засега не може да се зборува дали технички земјите ќе бидат во рецесија.
„Инфлацијата има високи стапки. Зборуваме за навистина прегреани економии. Пред некое време инфлацијата беше задржана само на одредени стоки, но сега гледаме дека таа се проширува. Добро е што економиите се жешки, но сега мислам дека е значајно тие да се оладат. Многу е важно да има еден период во кој економиите ќе растат побавно отколку нивниот производствен капацитет. Мора да се отстрани таа прегреаност. Дали ќе има рецесија во техничка смисла – одговорот на тоа прашање е нејасен. Се разбира дека има можност за период на бавен, но не толку негативен раст и развој“, рече Кругман.
Според него, економиите постепено ќе се вратат во својата патека, иако тоа тешко се менаџира. Објасни дека без разлика дали ќе има или не рецесија, сите ќе чувствуваме економска мака и болка. Сепак, тој посочи дека добра вест според него е што податоците, анализите, и истражувањата не покажуваат дека инфлацијата станала дел од нас и оти е вкоренета во глобалната економија. (С.К.)