Специјалното јавно обвинителство не е надлежно за случајот „Сопот“, затоа што тој случај е од пред 2008 година, вели претседателот на Советот на јавни обвинители, Петар Аневски.
„Ние сме одговорни за оценување на законските потези што ќе ги преземе Специјалното обвинителство. Кај нас е предметот, на следната седница ќе биде разгледан. Настанот се случил пред 13 години и Јанева не е овластена за настаните што се случиле пред 2008 година. Ние побаравме дополнителни информации од Специјалното обвинителство, но речиси еден месец не сме ги добиле информациите кои сме ги побарале“, велат од Советот на јавни обвинители.
Од СЈО велат дека независно од периодот кога се случил настанот, СЈО има право и надлежност да ги истражува случаите.
Специјалното јавно обвинителство пред неколку дена преку соопштение информираше дека на 4 ноември од ОЈО за гонење организиран криминал и корупција го побарале предметот за случајот „Сопот“ за да одлучат дали овој предмет е во нивна надлежност, имајќи предвид „јавно објавен разговор од незаконски следените комуникации во врска со случајот“.
Во разговорот објавен од лидерот на опозицијата, поранешната министерка за внатрешни работи Гордана Јанкулоска и ексшефот на Управата за безбедност и контраразузнавање разговараат за тоа каква пресуда треба да биде донесена за овој случај.
Во „Сопот“, станува збор за судски процес во врска со подметнатата експлозивна направа во близина на кумановското село Сопот, од која во 2003 година загинаа двајца припадници од контингентот на НАТО и еден македонски државјанин, за што подоцна беа осудени 11 лица, етнички Албанци.