На седницата на Советот на Град Скопје денес обраќање имаше советникот од Демократскиот сојуз Славчо Јовановски кој зборуваше за состојбите во Јавното претпријатие „Градски паркинг“ настанати по именувањето и разрешувањето на двајца директори во рок од еден месец.
– „Градски паркинг“ е претпријатие кое е единствено во градот што работи на пазарни основи, без дотации од Град Скопје или од Владата, претпријатие без загуби, претпријатие кое обезбедува нормално одвивање на сообраќајот, пристап до станбени објекти при пожар, безбедносни мерки при посета на странски делегации, спортски натпревари и слично. На 15 декември го разрешивте директорот (Борче Јакимовски) кој домаќински и без дамка го водеше претпријатието 12 години. Тој успеа да ја изменаџира и ковид кризата, без никакви субвенции и четири месеци прилив на средства блиску до нула, а притоа навремено да се исплати плата на вработените. На 31 декември назначивте директор (Филип Пасху) кој во меѓувреме го разрешивте и на 12 јануари именувавте нов ВД директор (Бојан Христовски), кој нема соодветно образование за таа позиција, вели Јовановски.
Според него последниот директор доаѓа и без консултации дава изјави за привилегии, за оправање на претпријатието и негово ставање на здрави нозе и слично.
– Не го обвинувам човекот за тоа, но сепак, пред да дава такви изјави барем да се консултираше со менаџерскиот тим, да се запознаеше со работата и проблемите на претпријатието. За жал, користи извори кои што се непроверени, а нивна цел е да се докопаат до некоја коска. Јавно претпријатие не се води како партиски штаб, во кабинетот на директорот со неговите послушници и со пласирање наредби по вертикала и хоризонтала, без некакво познавање на материјата. Со доаѓањето на ВМРО-ДПМНЕ на власт во општина Аеродром, стопирана е работата на два нови паркинзи кои беа претходно отворени, информира Јовановски.
Mенаџирањето на јавното претпријатие треба да оди во насока на отворање на нови паркинг места и задржување на постојните, а не во лов на вештерки, подвлече на крајот од своето обраќање советникот Јовановски.