Советничката група на СДСМ во Град Скопје на утрешната седница на Советот ќе побара да се направи ревизија за работењето на фирмата „Дрисла ДОО“ Скопје која е во јавно – приватно партнерство меѓу италијанската компанија „ФЦЛ Амбиенте“ и Град Скопје.

„Ние се сомневаме дека италијанската компанија нема инвестирано ниту едно евро во Дрисла. Единствените инвестиции се оние кои ги направи Градот во изминатите неколку години. Веруваме дека приватниот партнер преку фактури ја празни сметката на компанијата. Ќе бараме информација за работењето на Дрисла, но и државниот ревизор да го провери работењето на фирмата“, брифираат од советничката група на опозицијата во Советот.

Град Скопје на минатата седница по трет пат ја усвои одлуката која Германската фирма што учествуваше на тендерот за јавно – приватно партнерство за „Дрисла“ ја обжали на Управен суд.

Координаторот на советничката група на СДСМ, Драги Давчевски, тогаш рече дека Вишиот Управен суд донел одлука да се поништи тендерот и да се започне нова постапка.

„Ова е второ поништување од судот во Македонија. Италијанската компанија „ФЦЛ Амбиенте“ вети инвестиции, но до денеска нема ништо освен канали и сливници кои се изградени со парите од Градот“, рече Давчевски.

Тој побара и да се активира банкарската гаранција затоа што компанијата не инвестирала во „Дрисла“ ниту еден денар.

Директорот на депонијата „Дрисла“,  Горан Ангеловски, врати со тоа што рече дека целата постапка за избор била транспарентна и со одлуката на Вишиот Управен суд тоа се потврдило.

Одговарајќи на новинарско прашање, колку пари досега инвестирала италијанската компанија „ФЦЛ Амбиенте“ во „Дрисла“ и колкава била обврската за инвестирање  во првите 4 години, Ангелов рече дека досега се инвестирани 3,5 милиони евра, но само за подготовка на детално урбанистичка планска документација. Тој додаде дека причината за ова е затоа што немале добиени никакви дозволи од Министерството за животна средина, а обврската на италијанската компанија била да инвестира 73 милиони евра во првите 4 години.

Според документите од италијанскиот регистер на трговски друштва, „ФЦЛ Амбиенте“ е формирана на 14 февруари 2012 година или само три дена пред тие и нивниот конзорциумски партнер – големата италијанска фирма „Униеко“ да ја дадат својата понуда.

ФЦЛ Амбиенте“ е во сопственост на мрежа на компании на фирмата „Ферацоли С.П.А.“, која според трговскиот регистар е мала компанија и работи како „финансиски посредник“, а во 2012 година имала обрт од 310.744 евра и профит од 7.715 евра.

Без искуството на Униеко во екологијата и градежништвото, како и профитите и обртите поголеми од 500 милиони евра, „ФЦЛ Амбиенте“ не би можела да го обезбеди договорот за скопската депонија.

Па сепак, се чини, дека Униеко, освен со учеството на тендерот, нема понатамошна улога во проектот за Дрисла. Компанијата дури не се појавува ниту како сопственик заедно со „ФЦЛ Амбиенте“ во новата фирма за јавно-приватно партнерство, која е наменски формирана за да ја води депонијата.