Советникот на Доналд Трамп, кој е сопруг на неговата ќерка Иванка, исто како и Мајкл Флин, се сретнал со руски официјални претставници, а тоа се случувало во момент кога релациите САД-Русија беа под интензивен надзор поради хакерските напади врз Демократскиот национален комитет.
Џаред Кушнер заедно со Флин, во декември минатата година во кулите на Трамп се сретнале со рускиот амбасадор Сергеј Кисљак, а според извори од состанокот, разговорот се одвивал кратко, на кој страните се запознавале.
Состанокот траел околу 10 минути.
Флин поднесе оставка веднаш откако Њујорк Тајмс објави дека тој остварувал средби со руски претставници пред да стане дел од официјалната администрација, а според американските закони, казниво дело е цивил да преговара за меѓународните односи на државата.
Присуството на Кушнер на овој состанок, го објави Њујорк Тајмс, а се работи за огромен медиум на кој администрацијата на Трамп неодамна му забрани да присуствува на брифинзи во Белата куќа.
Изворот на Тајмс за состанокот на Флин и Кушнер со Кисљак сепак вели дека ова не треба да загрижува бидејќи се работело за состанок на кој страните се запознавале во однос на подобрување на односите меѓу земјите. Кушнер се сретнал и со дузина други амбасадори.
Уште еден советник од кампањата на Трамп, Џ.Д. Гордон обелодени дека разговарал со руски претставници, но вели тие не биле ништо поразлични од она што тој отворено го зборувал, туку се работело за подобрување на односите.
– Тоа не беше ништо поразлично од она што јас јавно го зборувам или за време на семинари и конференции, вели Гордон.