Франција е нов светски ракометен првак. Тронот што „триколорите“ го зазедоа во Катар пред две години го одбранија попладнево во распродадената „Берси арена“ во Париз. Во финалето ја совладаа Норвешка со 33:26 (полувреме 18:17) и ја освоија шестата шампионска титула.
Најефикасен во мечот за златниот медал беше Никола Карабатиќ со 6 гола, по пет постигнаа Мае, Гигу и Порт. Норвежаните одлично се држеа во првата третина од средбата. Имаа водство и со три гола разлика и останаа конкурентни по првиот дел. Но, не издржаа во продолжението.
Како домаќинот нагазуваше на гас, така нивната игра се распаѓаше и по одличните 30 минути, на крајот мораа да се помират и со убедливиот пораз. Тонесен беше нивни прв стрелец со пет гола, Хансен, Бјорнсен и Мирол реализираа по четири.
Бронзениот медал го освои селекцијата на Словенија која во утешното финале, по голем пресврт во второто полувреме, триумфира против Хрватска со 31:30.
Македонија го освои 15 место на шампионатот. Во фазата по групи в Мец, „црвено-жолтите“ забележаа победи над Тунис и Ангола, порази од Словенија и од Шпанија и реми со Исланд. Во осминафиналето беа поразени од, сега сребрената репрезентација на турнирот, Норвешка со 24:34.