Министерството за труд и социјала избрка од работа шест вработени во транзитниот центар Табановце. Одлуката им била соопштена усно преку трето лице, откако претходно по меил било испратено известување дека договорите за работа им се невалидни. На сите шестмина отпуштени договорите им важат до крајот на октомври, а се потпишани од екс министерката Фросина Ременски. Една од нива е Софија Липа која останува социјален случај, без работа.
„Јас останувам социјален случај, не ми следува ниту социјална помош бидејќи сум имала стан во кој живеам сама. Такво е образложението на социјалните служби. Ние сме избркани, а на наше место веднаш се примени веднаш нови луѓе блиски до ДМРО ДПМНЕ. Тројца од тие што имаат договори кои с е потпишани од Ременски останаа на работа, тие се исто така блиски до владеачката партија“, изјави з а НОВА Софија Липа.
Освен Софија Липа отпуштени се и Елана Ванчевска, Елена Станковска и уште тројца други кои работеле во транзитниот центар Табановце. Дел од нив работеле во администрација,а дел како технички персонал во кампот. Еден од нив има тешко болно дете, за кое требаат пари за лекување.
„Одлуката ја добивме на 29 јуни по електронски пат, а на неа стои дека Спасов ја потпишал на 15 јуни. Кога се пожалавме во Министерството за труд и социјала, одговорниот Дејан Ивковски ни рече да си продолжиме да работиме. Така работевме до пред некој ден, кога истиот тој се јавил телефонски кај една колешка и и кажал дека сме отпуштени од работа, да не доаѓаме повеќе. Какво е ова лицемерие? Македонија вработува или отпушта? “, праша Софија Липа.
За само еден месец од кампот се отпуштени од работа 14 вработени кои дадоа се од себе во најголемата гужва со бегалската криза.
„Нас ни беше кажано дека договорите важат до крајот на декември и дека по потреба ќе бидат обновени. Дека остануваме на работа, па макар и само еден бегалец да има во транзитниот центар“, вели Ванчевска, една од отпуштените од работа.
Во моментот во транзитниот центар има 81 бегалец и работата си тече како и досега, но со нови вработени. Избрканите немаат не смеат да влезат таму. Тие се обратиле во Министерството за социјала, но не добиле соодветен одговор.
Отпуштените кои се обратија во редакцијата на НОВА, велат дека таму работеле без никаква заштита, без здравствено и пензиско осигурување. Сметаат дека се отпуштени бидејќи не се членови на ВМРО ДПМНЕ.
„Дневно имавме по 2-300 бегалци и мигранти. Имаше разни заразни болести, шуга, сипаници и слично. Ние не бевме заштитени, го ризикувавме нашето здравје, велат нашите соговорнички.
Во Министерството за труд и социјала, портпаролот како и многу пати до сега не беше достапен на неговиот мобилен телефон. Неофицијално, високи извори за НОВА од ова Министерство потврдија дека луѓето биле отпуштени бидејќи немале потписи и двајцата министри, Спасов и Ременски. Признаваат дека на некои кои имаат исто така само потпис од Ременски им се продолжени договорите, додека другите се отпуштени од работа. Ние само извршуваме наредби од „горе“, велат во Министерството.
За ваквата селективен и дискриминаторски однос на Министерството з а социјала тие пријавиле во Хелсиншкиот комитет, Народниот правобранител и Трудовата инспекција. Софија Липа побарала објаснување и од лидерот на ВМРО ДПМНЕ, но не била примена во седиштето на партијата.