Денеска во Собранието на Република Македонија, парламентарното мнозинство, врз основа на одредбите од Деловникот за работа на Собранието легитимно побара од претседавачот на конститутивната седница да стави предлог на гласање согласно членот 79 став 2, во кој стои дека во текот на расправата може да се побара да се премине на наредната точка од дневниот ред, изјави денеска на прес конференција Оливер Спасовски од СДСМ.
Тој вели дека ова го побарале со цел да се деблокира седницата и да може да се избере нов претседател на Собранието.
„ Наместо да се испочитува Деловникот и претседавачот со седницата да го стави овој предлог на гласање, заради тоа што во Деловникот, во оваа одредба јасно и прецизно стои дека без расправа се преминува на гласање, уште еднаш Трајко Вељаноски покажа како на најгруб начин се крши Деловникот на Собранието и се узурпира позицијата на претседавач на конститутивната седница“, рече Спасовски.
Тој додаде дека ќе продолжат да го бараат она што е нивна обврска ќе направат се за да се деблокира работата на Собранието.