Министерот за внатрешни работи Оливер Спасовски смета дека вината за бегството на Никола Груевски не е кај МВР, но признава дека се работи за пораз на целиот систем, што треба да го лоцира истрагата.
-Груевски не му побегна на МВР. Тоа е фактичка состојба. Јас не говорам за префрлување на топка, туку за овој случај да видиме каде ни е поразен тој систем, за да може понатаму преку законски механизми, да не ни се случуваат вакви настани, рече Спасовски вчера во емисијата „Лица“ на 1ТВ.
Тој истакна дека деталите ќе бидат споделени со јавноста кога истрагата ќе биде целосно завршена, но и дека вината не ја лоцира во МВР.
-Има многу прашања кои можам јас лично да ги поставам, но сакам да заврши до крај истрагата и Јавното обвинителство да излезе и да каже зошто тоа се случи, рече Спасовски.
Според Спасовски не е аргументиран предлогот за негова интерпелација, односно дека се работи за паушални кажувања.
-За мене нормална демократска постапка која може да биде покрената е интерпелацијата, јас ја доживувам како можност да поразговараме со пратениците. Имаме право на одговор, кој ќе го доставиме до пратениците на Собранието, јас сум присутен речиси на сите пратенички прашања со целосен респект кон Собранието. Факт е дека малку прашања ми поставиле. Сепак ова е една од алатките во демократијата и јас сум подготвен да одговорам на сите прашања. Тоа што денес го слушнав беа паушални кажувања, да се каже нешто како причина за поднесување на интерпелацијата, вели министерот за внатрешни работи во емисијата „Лица“ на 1ТВ.