Јавноста можеби ќе може да ги види снимките во случајот со нападот врз полицајката од функционерот на ДУИ Бекир Асани, доколку тоа го дозволи обвинителството, изјави министерот за внатрешни работи Оливер Спасовски во емисијата Топ-тема на Телма.
Тој вели дека лично не ја гледал снимката и оти не може да каже дали навистина полицајката се удрила од пајакот.
– Случајот предизвика внимание во јавноста затоа што тој истиот учестувувал во напади врз новинари и други лица и тоа создава револт во јавноста. За конкретниот случај е утврдено дека имало само вербални закани и навреди и врз основа на тоа е поднесена пријава за омаловажување, рече Спасовски и додаде дека полицајката ја кажала вистината и не била под притисок да ја смени изјавата пред него.
Тој рече дека Асани бил приведен во полициската станица Бит пазар, каде дал исказ, кој е внесен во материјалите во постапката покрената од обвинителството, но и поради заканите кон претседателот на ЗНМ Насер Селмани, за што исто така е отворена постапка.
Во однос на приведувањето на Драган Симоновски, советник во кабинетот на министерот за внатрешни работи, Спасовски рече дека не е партиска пресметка.
Симоновски беше приведен на почетокот на месецот првично поради сомнение за поткуп, а потоа се покажа дека во текот на февруари во својство на службено лице, распореден со наредба, државен советник за полициски и криминалистички работи во Кабинетот на министерот за внатрешни работи, носител на безбедносен сертификат „државна тајна“, одал службена тајна на лице кое било предмет на посебни истражни мерки.
– Тој не може и не треба да ги знае тие информации, такви информации не треба да знам ниту јас, а како дошол до тие пи-мерки ќе покаже истрагата. Информациите можел да ги добие од три извори од МВР, ОЈО или од судот. Ова е инцидентет случај, додаде тој.
Нагласи дека оперативни информации истекувале со години и оти сега прашање е да се воспостави систем во интерес на заштита на граѓаните и државата.