Националниот фронт за борба против корупција, не значи формирање нова институција, ниту збир од институции кои тоа ќе го прават, туку воспоставување механизам на функционирање на сите подеднакво во целиот тој процес на преземање на активности и отстранување на недостатоците во сите сегменти, во МВР, во Јавно обвинителство, во судството. Едноставно јакнење на системот, истакна министерот за внатрешни работи Оливер Спасовски во вечерашното гостување во дневникот на телевизијата „Сител“.
– Еве, ние на пример, сега разговараме и преку еден ИПАРД проект во којшто работиме исклучиво за финансиските истраги, и ги согледавме сите недостатоци на нашиот систем. Многу процесни дејствија коишто се преземаат во предистражната и истражната постапка, треба да бидат забрзани, да бидат скратени. Треба да бидеме ефикасни. И најважно од се што е – институциите за спроведувањето на Законот да функционираат под иста процедура, рече Спасовски.
Тој подвлече дека борбата против криминалот и корупцијата нема да биде ефикасна во очите на јавноста, ако тие не го видат крајниот исход. Ако не видиме извршување на пресуда за секој еден криминалец којшто го утврдил судот и ако тој имот којшто го стекнал на криминален начин, нема да биде одземен и вратен кај државата.
– Секаде каде што има пречки на патот од еден ваков аспект, треба да бидат отстранети. Тоа е наша задача, истакна Спасовски.
За случаите на струшкиот градоначалник Рамиз Мерко, за внукот на Али Ахмети, Дрин Ахмети, Спасовски рече дека МВР постапува по секоја наредба што ќе ја добие од ЈО и оти нема селекција дали станува збор за актуелен, за поранешен функционер или за обичен граѓанин.
– Така што, и во оваа ситуација ние дадовме информации дека сме постапувале по предмети. И секогаш кога ќе биде побарано од МВР за кого било да се постапува да се собираат докази да се предадат на ЈО, тоа ќе го направиме, нагласи Спасовски.
На прашањето за очекувањата околу уставните измени, Спасовски истакна дека ова е клучниот политички момент не само за исчекорувањето во евроатлантските процеси на Република Северна Македонија, туку генерално на целиот регион.
– Мислам дека сега одредени состојби, геостратешките политики и испреплетувањето на интересите, од една страна покажаа дека Европа не може да биде целосно консолидирана доколку земјите од Западен Балкан не бидат дел од Европската Унија и тоа создаде еден поголем интерес за интеграција на Република Северна Македонија и на државите од регионот генерално и мислам дека тој момент мора да биде искористен. А за да биде искористен не треба само декларативни изјави и кажувања за тоа што ние сакаме и посакуваме како политички водства и генерално политички партии, туку тоа треба да го покажеме пред граѓаните. Мислам дека кога се зборува за национални интереси, а еден од клучните национални интереси е Република Северна Македонија да биде дел од европското семејство тука нема ниту политика ниту политикантство, тука треба да се гледа интересот на државата и на граѓаните, истакна Спасовски.