Претседателот на Владата и носител на листа на коалицијата „Можеме“ во Изборната единица 2, Оливер Спасовски, денеска гласаше на избирачкото место во О.У. „Христијан Тодоровски Карпош“ во Куманово. По гласањето тој истакна дека денеска е исклучително важен ден за земјата и дека како Влада покажале дека може да се организираат фер, демократски, слободни избори и во услови на сериозна здравствена криза, на пандемија.
„Изборите се безбедни за здравјето и за животот на граѓаните. Признание на Комисијата за заразни болести и на Државната изборна комисија, затоа што воспоставиле протоколи со кои се гарантира безбедно гласање од аспект на здравјето на граѓаните кои во вакви услови слободно можат да излезат, да ја изразат својата волја и како што потенцира, врз основа на одлуката да се види каде ќе се движи државата наредниот период“, рече Спасовски.
Спасовски рече дека ова е сериозен предизивик, бидејќи и времињата се сериозни и одговорноста на секој граѓанин во Северна Македонија е голема, додаде тој, со цел да се воспостават, институции кои што се ефикасни, институции кои што се со полн легитимитет и кои што ќе можат да носат одлуки во наредниот период за како што истакна, зачувувањето на здравјето, да носат одлуки кои што ќе значат подобрувањето на економската состојба во државата, односно економската криза.
„Јас очекувам денеска граѓаните да излезат масовно на изборите, да го потврдат патот по кој што сите ние се движевме, да избереме сигурност, јасна визија и перспектива наспроти опасноста и враќањето назад“, изјави Спасовски по гласањето во Куманово.