Премиерот Оливер Спасовски претпладнево на својот Фејсбук профил посебно ја акцентира планираната поддршка за земјоделството која е дел од третиот владин пакет економски мерки за помош на стопанството.
Мерките, меѓу другото, предвидуваат поддршка на аграрниот сектор со пет милиони евра преку Развојната банка, платежна картичка за субвенционирање, 50 отсто од т.н. „зелена нафта“ и стимулирање на преработувачите на грозје за производство на нови продукти.
„Овозможуваме и јавни-приватни партнерства во лозарството и во тутунскиот сектор, воведуваме долгорочен закуп на пасишта, ќе понудиме окрупнување на земјоделско земјиште за поголема конкурентност на македонското земјоделство, воведуваме Програма за финансирање на микро земјоделски компании, како и мерки за модернизација на земјоделството“, пишува Спасовски на својот Фејсбук профил.
Премиерот вчера на прес-конференција во Владата го соопшти третиот пакет економски мерки за помош на стопанството што е проектиран на 355 милиони евра и насочен кон 730.000 корисници.