Генералниот секретар на СДСМ Оливер Спасовски вели дека по истеко тна крајниот рок за пријавување на спорните гласачи кој ДИК го заврши вчера, се докажало дека остануваат спорни гласачи како што тврдеше опозицијата.
-Се’ е потврдено. После завршувањето на рокот за пријавувањето на спорните гласачи во Р. Македонија, се потврдија сите тези на Социјалдеморкатскиот сојуз и на опозицијата, дека во Р. Македонија има фантомски гласачи, запишани гласачи во Избирачкиот список коишто се злоупотребуваа за време на изборниот процес.
После рокот за пријавување, се докажа дека околу 30 илјади избирачи коишто се наоѓаа на Избирачкиот список во Р. Македонија, не постојат. Не можеа да се пријават, и со тоа се потврди тезата дека ВМРО-ДПМНЕ и ДУИ на изборите коишто се одржуваа досега во Р. Македонија, сериозно го злоупотребувале избирачкото право на граѓаните на Р. Македонија, изјави Спасовски денеска при посетата на Струга.
Од ДИК пак информираа дека непријавените гласачи ќе имаат време од петнаесет дена по распишувањето на парламентарните избори за да го регулираат правото на глас.
Оние 30,502 кои досега граѓани не се пријавиле, а се нашле на листата на спорни гласачи на ДИК, тоа ќе може да го сторат дополнително откако вчера по истекувањето на рокот ДИК одлучи истиот да го продолжи. До вчера во ДИК се пријавиле само една четвртина од спорните гласачи или 8 922 граѓани. По заклучувањето на Избирачкиот список, непријавените гласачи ќе бидат избришани од списокот.