Министерството за внатрешни работи ги направи сите неопходни обврски за реална операционализација на Законот за заштита на укажувачи, истакна денеска министерот за внатрешни работи Оливер Спасовски.
„Сметам дека за ефикасна примена на Законот за заштита на укажувачите значително влијание има потребата од негово уште поблиско претставување на севкупната јавност, нејзино анимирање од бенефитите што овој Закон ги носи. Не случајно во сферата на работата на МВР, Одделението за превенција и интегритет при Одделот за внатрешна контрола во рамки на Програмата за јакнење на полицискиот интегритет во изминатиот период, посвети особено внимание на информирањето и приближувањето на законот до вработените опфаќајќи ги сите полициски службеници од сите СВР-а и од Граничната полиција како примарни таргет групи на таа превентивно-едукативна програма“, рече Спасовски.
Министерот нагласи дека и покрај низата преземени активности во поглед на примената на Законот, сеуште не можеме да констатираме дека оваа норматива во целост ја оправда посакуваната цел, независно што навремено, како што рече, одговоривме на сите структурни претпоставки за негова конкретна примена.
Спасовски учествуваше на работилницата „Пет години од имплементацијата на Законот за заштита на укажувачи“, во организација на Транспаренси Интернешнл, а во рамки на проектот „Застапување на имплементација на законодавство за укажувачите во Република Северна Македонија“, поддржан од грант на Balkan Trust for Democracy, проект на German Marshall Fund на САД и амбасадата на Кралството Норвешка во Белград. На работилницата учество земаа претседателот на Транспаренси Интернешнл – Македонија, Слаѓана Тасева, вицепремиерката Славица Грковска, претседателката на Државната комисија за спречување на корупцијата, Билјана Ивановска, Народниот правобранител Насер Зибери и претседателот на Основното јавно обвинителство – Скопје, Гаврил Бубевски.