Основниот суд Скопје 2 го одби барањето за забрана за самостоен настап на изборите на Левица како неосновано, соопшти партијата денеска на социјалната мрежа Фејсбук.
Оттаму велат дека ова претставува уште еден правен пораз на обидот на некои инсајдери и саботери да го оневозможат учеството на Левица на предвремените парламентарни избори.
„Согласно приложеното, јасно се гледа дека одлуката е статутарна и легална, уште повеќе донесена во демократска постапка, изгласана од мнозинството членови на Централниот комитет (највисокото раководно тело помеѓу два редовни Пленуми), по претходна консултација со членовите на локалните организации на Левица, “ е наведено во нивното соопштение.
Од таму потенцираат дека огромното мнозинство од базата на Левица зазеде став за самостоен настап на предвремените парламентарни избори.
Неодамна предлог за донесување на привремена мерка за забрана на партијата да учествува на изборите беше поднесена до сдуот, потпишана од Жарко Петрески од Скопје, кој се претставува како основач и член на Левица.
Левица реагираше дека тој најверојатно е манипулатор кој не е дел од основачите.