Српските власти сметаат дека Интерпол не може да укине потерница со којашто Белград го бара Рамуш Харадинај поради воени злосторства, туку дека може само да ја направи невидлива за членките на оваа организација.
„Потерницата и натаму е на сила“, Танјуг цитира изјава на неименуван извор од српското Министерство за правда.
Министерството за правда тврдело дека „Интерпол не може да укине потерница која ја распишала некоја држава членка“, така што според нив, тоа важи и за Харадинај.
Министерството за внатрешни работи на Србија најави дека со Министерството за правда и обвинителството за воени злосторства ќе вложат жалба на одлуката на Интерпол.
Косовскиот министер за правда, Абелард Тахири за приштинските медиуми денеска изјави дека Интерпол ја укинал потерницата против Харадинај и уште 17 лица кои на меѓународната полиција ѝ ги доставила Србија.