Претседателот на Србија Александар Вучиќ на денешната средба со македонскиот премиер Зоран Заев во Белград истакнал дека Србија е искрен пријател на Македонија чија определба за добри односи и унапредување на соработката не треба да се доведуваат во прашање.
Како што соопшти прес службата на српскиот премиер, Вучиќ ја искажал поддршката на Србија за Македонија на патот кон европските интеграции.
Во тој контекст Вучиќ истакнал дека Србија ја избрала воената неутралност, додека Македонија го избрала НАТО, но дека е важно секоја од земјите да го почитува изборот на другата.
Притоа тој истакнал дека заедничката цел и најголем интерес на двете земји треба да бидат мирот и стабилноста во регионот и дека Србија е отворена за сите иницијативи кои придонесуваат кон тоа.
Посебно е истакната потребата од инфрастрктурно поврзување, како и за зголемување на економската и трговската размена.
Во тој контекст, премиерот Заев истакнал дека треба да се искористат сите можности, трговската размена да достигне милијарда евра.
Заев притоа предложил поедноставување на царинските процедури на граничните премини, односно царинската процедура што ќе се спроведе во едната земја, да важи и во другата, со што би се намалиле колоните и ќе се забрза протокот на луѓе и стоки.
Прес службата на македонската Влада соопшти дека е разговарано да продолжат заедничките проекти на двeте држави во однос на евроинтеграциите.
Од особен интерес е соработката и на безбедносните прашања, економската и социјална благосостојба на граѓаните на двете земји, како и регионалните иницијативи за кои и од Република Македонија и од Република Србија има особено голем интерес.
Република Македонија и Република Србија ќе ги реафирмираат идеите за соработка на одбележувања на значајни настани, датуми и културно-историски места од интерес на двете земји, како и конкретна соработка на културен план на ниво културно-информативни центри во двата главни града.
Отворени се многу проекти за соработка за време на оваа средба за кои ќе следуваат конкретни подготовки и динамика која ќе биде потврдена на најавената заедничка владина седница која ќе се одржи наскоро.
На средбата во „Палата Србија“, македонскиот премиер на својот српски домаќин му подари дрес на фудбалскиот клуб Вардар со бројот девет и негово презиме на задната страна.