Премиерот Ковачевски денеска се сретна со Стефан Дион, специјален пратеник на премиерот на Канада, Џастин Трудо, за Европската Унија и амбасадор на Канада во Франција и Монако.
На состанокот е изразена јасна поддршка за правецот во којшто се развива нашата држава и очекување дека Северна Македонија, по членството во НАТО, ќе продолжи со натамошните чекори во евроинтеграциите.
Поздравени се недвосмислените и цврсти политики на Ковачевски и на Владата, и усогласеноста со надворешната политика на ЕУ, како и дијалогот во државата и во добрососедските односи, преку кои се доаѓа до решенија.
Оценето е дека Македонија ѝ е потребна на Европската Унија како пример за принципиелна демократска држава, која применува европски, прогресивни политики и вредности и дека токму поради тоа и заслужува да биде дел од Унијата.
При тоа е пренесена силна поддршка од премиерот Трудо и од Канада за натамошниот напредок на Северна Македонија во европските интеграции. Констатирано е и дека целиот Западен Балкан припаѓа на Европа и дека е од стратешко значење и за регионот и за Унијата, да продолжи проширувањето, со целосна интеграција.
Премиерот Ковачевски се заблагодари за традиционално добрите односи со Канада. Ова пријателство меѓу двете држави, како што рече премиерот Ковачевски, има длабоки корени, ако се земе предвид дека заедницата на граѓани од Северна Македонија во Канада е вградена во развојот на Канада и дава значаен придонес во билатералните односи.
„Канада е земја на толеранција, признавање на различностите и почит кон сите луѓе, што нѐ прави уште поблиски како држави, иако сме на географска оддалеченост. Голема благодарност до Канада и до премиерот Трудо за сета поддршка за доброто и добрата иднина на граѓаните на Северна Македонија“, рекол Ковачевски.
Македонскиот премиер нагласил дека во државата се формира европска коалиција којашто треба да го осигура европскиот пат, бидејќи другата опција е радикален национализам, за лични или туѓи интереси, што не е државен национален интерес, а е со штетни последици и во пошироки рамки.