Република Бугарија попушти пред едно од барањата кои го кочеа евроинтеграцискиот процес на земјава. Краткиот назив Северна Македонија веќе нема да биде пречка пред ниту една меѓународна институција. Ова на денешната средба го договориле премиерите на двете земји Димитар Ковачевски и Кирил Петков. Премиерот на Бугарија за ваквата одлука ги известил и Обединетите Нации, откако добил гаранција од македонскиот колега дека со употребата на кусото име, Северна Македонија нема територијални претензии кон делови од Република Бугарија.
Двете земји најавија и формирање на работни групи од повеќе области од интерес на граѓаните во двете земји со цел унапредување на меѓусебните односи на соработка и приближување на народите од двете страни на границата.
„Со премиерот Петков разговаравме за воспоставување на работни групи, во областа на инфраструктурата, економијата, трговијата, иновациите, евроинтеграциите и во областа на образованието и културата. Сметаме дека тоа се области кои значат многу повеќе за граѓаните, за нивната иднина за граѓаните од сите возрасти посебно за младите. Тие се направени како меѓуресорски работни групи во кои нема да учествуваат само политичари, туку ќе учествуваат и претставници на секторите за кои се однесуваат, рече премиерот Димитар Ковачевски.
Во однос на историската Комисија, Ковачевски вели оти оваа историчарите веќе имаат свој план за работа.
„Што се однесува до Историската комисија гледате дека овде нема претставници на Историската комисија. Значи, историчарите работат во еден подолг процес, бидејќи се работи сега и за период во минатото којшто тоа го прават врз основа на методологија и врз основа на дефинирање на одредени факти што ги имаат регулирано согласно со методологијата и јас лично се надевам дека прво, членовите на историската Комисија ќе информираат заеднички за тоа што е договорено и дека тоа што заеднички е договорено ќе биде мост кон иднината, а не враќање кон минатото, вели Ковачевски.
Премиерот на Бугарија Кирил Петков пак најави дека најдоцна за 60 дена ќе биде пуштена во употреба директната авио линија Скопје – Софија.
„На ваков начин ќе им покажеме на двата народа од двете земји дека добрососедството се мери практично, не само на ниво на политички изјави, туку на ниво на реални резултати на бизнис и работа и на ниво на патување од Софија до Скопје за 20 минути“, истакна Петков.
Ковачевски и Петков најавија одржување на заедничка владина седница на 25 јануари во Софија.
„Веќе на 25 јануари ќе се одржи и седница на двете влади, а потоа секоја седмица една од групите ќе се состанува со јасни цели и јасни резултати. На тој начин, ќе им покажеме на двата народа од двете земји дека добрососедството се мери практично, а не само на ниво на политички изјави“, рече Петков.
Новинарите побараа од Петков да дефинира кој народ живее во земјата во која е моментално дојден и на кој официјален јазик тука се зборува, но првиот човек на бугарската Влада само кусо одговори дека Бугарија прва ја признала Северна Македонија додавајќи оти Бугарија во целост го почитува правото на самоопределување на македонските граѓани.
По завршувањето на прес-конференцијата во Владата, новинарка од Бугарија му подари на премиерот Димитар Ковачевски, како што рече, здраво црвено бугарско јаболко во знак на доверба дека ќе работи на одржување на единството меѓу двете земји.
„Дозволете да ви подарам здрава црвена бугарска јаболка во знак на доверба и за запазување на нашето единство меѓу Бугарија и Северна Македонија“, му рече новинарката и му посака успешна работа.
(Б.Б.)