Премиерот Зоран Заев, за време на дводневната посета на Малта се сретна со претставниците на Форумот за демократска Македонија во Малта, Игор Филевски, Живанка Витанова и Стево Ѓоргиев.
Како организација на иселениците што се залага Македонија да биде демократска и правна држава, претставниците на ФДМ, изразиле поддршка на Владата за решавање на спорот за името со Грција и напорите за интеграција во НАТО и ЕУ.
Како што се вели во соопштнието од ФДМ, тие упатиле и забелешки за дел од кадровските решенија, на дипломатскиот дисконтинуитет во одредени земји со непоставувањето на амбасадори, на несоодветната родова застапеност на функциите, како и „нерешените судбини на свиркачите“ кои придонесоа за демократизација на Република Македонија и создавање услови за нов демократски процес во чекорењето кон правна држава.
Заев, велат од ФДМ, истакнал дека Владата секогаш ќе биде отворена за секоја конструктивна критика и ќе дејствува во подобрување на нејзината работа.
Тој ги објасни проблемите со кои се соочува Владата при реализирање на родовата еднаквост на функциите и настојувањето тој сегмент да биде подобрен во следниот период, па се` до начинот на кој ќе се решат испразнетите амбасадорски места.
Заев напоменал дека вршители на должност ќе бидат поставени во сите административни центри каде се чека нов амбасадори се додека не се реализира процесот што не може да добие своја разрешница без согласност од претседателот Ѓорге Иванов. Во Малта наскоро ќе биде отворено конзуларно одделение, поради се` поголемиот број работници што доаѓаат за работа во оваа островска држава.
Што се однесува до прашањето за „свиркачите“ премиерот Заев рекол дека Владата прави се` за нивно згрижување за да го пребродат вакуум просторот создаден поради правните ситуации во кои се затекнати. ФДМ и натаму ќе бара решение од Владата поради суштинската улога на „свиркачите“ во откривањето на корупцијата и злоупотребите на функциите од позиција на моќ.
По прашањето за решавањето на проблемот со Грција и евентуалниот референдум, премиерот Заев ја образложил реалната и правната ситуација во однос на гласањето во дијаспора, од условите кои ги имаат иселениците за гласање според Уставот и Законите во овој момент, до опцијата за подобрување на можностите за правото на глас на иселениците.
По предлог од ФДМ биле предложени следни средби со Малтежани кои имаат влијание во туристичкиот бизнис и севкупната економија на островот, а претставници на македонската влада би можеле да ги информираат за можностите за инвестирање на релација Малта-Македонија.
Според Заев иселениците недвојбено се сметаат за важен фактор како за економијата и инвестициите во Македонија, така и за конструктивната критика која ја упатуваат со цел подобрување на администрирањето и функционалноста на македонската влада.
#ПоинакваДијаспора