Во Грција во првите 23 дена од јуни се регистрирани 23 давења според податоците од национална организација за јавно здравје што ја ставаат државата на шестата позиција меѓу земјите членки на Европската унија. Во текот на минатата година се удавиле 413 лица или 56 повеќе од 2017 година.
Статистиката на грчката организацијата за јавно здравје вели дека 67 отсто од несреќните случаи со давење се забележани во месеците јули и во август, 42 отсто се случиле во претпладневните часови, во 55 отсто на само три метри од плажа, а 90 отсто на оддалеченост од 10 метри.
Грчките медиуми во анализите на проблемот за изминатиот период како причина го наведуваат недоволниот број на спасувачи на плажите. Само во текот на вчерашниот ден, три лица се удавија во Грција во два одвоени случаја во базени на хотели на грчките острови Родос и Крит. И во двата случаја, на хотелските базени немало спасувач во моментот кога се случиле давењата.