Министерката за култура Ирена Стефоска не е задоволна од работата на струшкиот градоначалник Рамиз Мерко за спроведување на препораките од УНЕСКО, но вината ја лоцира во институциите кои требало да го санкционираат.
Локалната власт има свои ингеренции и секој треба да си понесе одговорност за тоа што е надлежен, вели министерката која на Мерко му порача дека не му се плаши.
Граѓаните од туристичките центри имаат проблем и со депониите кои често горат и го загадуваат воздухот, а се наоѓаат на самите влезови кон Охрид и Струга. Рамиз Мерко вели дека депонијата во неговиот град се одржува и е добра локација за пикник.
Неговиот сопартиец, министерот за животна средина Нуредини, нема одговор зошто таа не е дислоцирана.
Министрите со нивните колеги од Албанија денеска со заедничка изјава се обврзаа на забрзани активности за заштита на Охридскиот регион, како светско природно и културно наследство заштитено од УНЕСКО.