Кремљ намерно шири отворени лаги дека САД и Украина спроведуваат активности со хемиско и биолошко оружје во Украина, објавија денеска САД, а пораката преку социјалната мрежа Фејсбук ја пренесе и американската амбасада во Северна Македонија. Видовме, се вели во објавата, дека и претставници на Кина ги повторуваат овие теории на заговор.
„Оваа руска дезинформација е тотална глупост и не е прв пат Русија да измислува вакви лажни тврдења против друга земја. Исто така, овие тврдења беа разоткриени дефинитивно и постојано во текот на многу години“, се вели во соопштението на Стејт Департментот, кое го пренесува американската амбасада во земјава.
„Русија измислува лажни изговори во обид да ги оправда сопствените ужасни акции во Украина. Соединетите Држави не поседуваат ниту работат никакви хемиски или биолошки лаборатории во Украина, тие се во целосна согласност со своите обврски според Конвенцијата за хемиско оружје и Конвенцијата за биолошко оружје и никаде не развиваат или поседуваат такво оружје“, наведува американскиот Стејт Департмент.
Притоа се додава дека Русија е таа која има активни програми за хемиско и биолошко оружје и ја прекршува Конвенцијата за хемиско оружје и Конвенцијата за биолошко оружје. „Конечно, Русија има навика да го обвинува Западот за злосторствата што самата Русија ги прави. Овие тактики се очигледен трик на Русија во обид да ги оправда понатамошните однапред смислени, неиспровоцирани и неоправдани напади врз Украина. Целосно очекуваме Русија да продолжи да ги удвојува ваквите тврдења со дополнителни неосновани наводи“, реагираат САД.
Инаку, Конвенцијата за биолошко оружје (BWC) или Конвенција за биолошко и токсинско оружје (BTWC), е договор за разоружување кој ефикасно забранува биолошко и токсинско оружје со тоа што го забранува нивниот развој, производство, стекнување, пренос, складирање и употреба. Целосното име на договорот е Конвенција за забрана на развој, производство и складирање на бактериолошко (биолошко) и токсинско оружје и за нивно уништување.