За Бугарија, Република Северна Македонија е „болна тема“. Ова го изјави бугарскиот технички министер за надворешни работи Светлан Стоев, како одговор на прашањето за отвореноста на патот на Скопје кон Европската унија за време на словенечкото претседателство со Советот на ЕУ, пренесуваат дел од бугарските медиуми. Стоев истакна дека влезот на Северна Македонија во ЕУ не зависи само од желбата на Унијата.
„Мора да има активности и докази од страна на Скопје за да ги убедат не само европските партнери, туку и Бугарија дека се подготвени да ги решат проблемите што постојат и ни пречат да дадеме зелено светло“, рече Стоев.
Техничкиот министер за надворешни работи смета дека односите со Северна Македонија мора да се нормализираат, но исто така мора да се дадат гаранции дека договорите што ги потпишува Скопје во иднина ќе бидат имплементирани преку преговарачката рамка за пристапување во ЕУ. Колку се соседите искрени во намерите да ги исполнат своите обврски кон нас и кон другите земји, праша Стоев.
„Она што го гледаме во говорот на омраза што го шират некои политички сили и претставници на младинското движење, не зборува во оваа насока. Не слушнавме јасно разграничување во однос на кажаното. Сфатете колку е навредливо ова нешто и понекогаш прашувам како би се однесувале ако такво нешто се каже за нив од нивната соседна земја, праша Стоев.
Тој додаде дека би сакал да види резултат за време на словенечкото претседателство со Советот на ЕУ.