Иако грчкиот премиер Алексис Ципрас тврди дека неговата Влада ќе го истера докрај својот мандат, кој истекува во септември 2019 година или барем дека ќе се обиде да го направи тоа, сите показатели говорат дека изборите во Грција ќе се одржат порано, оценуваат грчките медиуми.
Одговорот на прашањето „колку порано може да се одржат изборите?”, зависи од тоа какви ќе бидат сосотјбите во економијата и развојот на настаните околку националните прашања на земјата, почнувајќи од спорот за името на Македонија.
„Та Неа“ смета дека сегашната политичка клима во Грција дава индикации дека ќе има предвремени избори. Повеќето пратеници од владејачката партија СИРИЗА размислуваат за избори, а очигледно вчерашното гласање за законот за нови мерки за штедење, е знак дека тие се загрижени за зачувување на своите позиции и за останување на власт, коментира весникот.
Некои пратеници проценуваат дека предвремените избори можат да се „некакво решение”, ако се утврди дека товарот од следниот преглед на програмата за спас или од она што ќе следи по истекот на сегашната трета програма, предизвика незадоволство во левото крило на СИРИЗА.
Лидерот на главната опозициска партија, Нова демократија, Киријакос Мицотакис веќе „објави предизборна тревога“ и бара изборите по секоја цена да се одржат уште оваа година.
Останатите од опозициски партии исто така размислуваат за своите потези во случај на предвремени избори, кои ќе зависат уште и од тоа кога и колку брзо во Германија ќе биде составена влада, бидејќи од неа зависи и понатамошната дебата меѓу ЕУ и ММФ за Грција и нејзиниот надворешен долг.
Но, резултатите од анкетите не и одат во прилог на СИРИЗА, која има големо заостанување зад конзервативната Нова демократија од 10 процентни поени.
Според анкетите, на третата позиција е новиот левоцентристички сојуз – Движење за промени, а веднаш зад него се екстремно десничарската Златна зора и Комунистичката партија на Грција. Сојузот на центристите и партија Независни Грци, која сега е дел од владејачката коалиција, се околу изборниот праг за влез во Парламентот.
Голема непознаница при евентуалната изборна трка ќе биде дали конзервативците ќе можат самостојно да состават Влада или ќе мораат да бараат коалициски партнер.
Грчките медиуми како можни термини за одржување на следните парламентарни избори ги посочуваат јуни оваа година, претстојнава есен и тоа најверојатно во октомври, мај следната година заедно со евроизборите или септември 2018 кога е крајниот рок за редовни избори.