Париз вечерва ќе биде центарот на Европа или барем во светот на фудбалот, центарот на светот. Англичанецот Марк Клатенбург ќе биде медијаторот за фер натпревар помеѓу фудбалските гиганти Франција и Португалија.
Со почеток во 21 часот, репрезентацијата предводена од Кристијано Роналдо ќе се спротистави на домаќинот Франција на Стад де Франс во Париз, по кој натпревар, ќе се знаат имињата на фудбалерите кои во историјата ќе бидат запишани со златни букви.
Португалија е досадна репрезентација, до полуфиналето не победи ниту еден меч во регуларните 90 минути, а заврши и како трета во својата група каде што приматот и го земаа Унгарија и Исланд.
Франција од друга страна беше многу убедувачка во своите победи, а во полуфиналето јасно даде до знаење дека сериозно атакуваат на златото кога ја совладаа можеби и најсилната репрезентација на Европскиот континент, светскиот првак Германија.
Хрватска, Полска и Велс се “жртвите“ на Португалците додека Република Ирска, Исланд и Германија паднаа пред галските петли на патот до големото финале.
До патот до финалето, Фудбалската федерација на Португалија досега заработи 17.5 милиони евра и тоа 8 милиони поради учеството, 1.5 милиони од трите нерешни средби во групата, 1.5 милиони за учество во осминафиналето, 2.5 за четвртфинале и 4 милиони за учеството во полуфиналето.
Французите се нешто побогати заработувајќи еден милион повеќе. Тие заработија 8 милиони поради учеството, 2.5 милиони за двете победи и едниот нерешен резултат во фазата во групи, 1.5 милиони за учество во осминафиналето, 2.5 за четвртфинале и 4 милиони за учеството во полуфиналето.
Доколку Португалија победи вечерва, тие вкупно ќе заработат 25.5 милиони евра, а доколку го загубат мечот, ќе си заминат дома со 22.5 милиони.
Пред Французите пак, предизвикот е 26.5 милиони по победа, или 23.5 милиони евра по евентуален пораз.
Двата табора се ослободени од сериозни загрижувања. Централниот дефанзивец на Португалија, Пепе се врати на целосен тренинг и физиотерапевтите му дадоа зелено светло да истрча на Стад де Франс, откако го пропушти полуфиналето против Велс. Се враќа и Вилијам Карваљо по суспензијата во полуфиналето.
Француските фудбалери немаат ниту повредени ниту суспендирани во нивните редови. Се очекува селекторот Дидие Дешамп, кој самиот знае што значи да се освои злато на големите натпреварувања како капитен на Франција, се очекува да го извади истиот состав кој ја победи репрезентацијата на Германија.
Какви ќе бидат насловите на медиумите од светот ќе се знае по 90 минути или по нешто повеќе од два часа игра доколку се изведуваат пенали.