Студентите маратонци кои веќе 13 дена трчаат во штафета кон Брисел, денес прават пауза во Стразбур, каде што беа пречекани синоќа. Тие ќе ја искористат можноста да го посетат Европскиот парламент и да разговараат со европратениците.
Тие беа пречекани од Србите од дијаспората, но и од Французите кои живеат во тој град.
Им беше приреден свечен прием, им беа доделени медали, а ја отпеаја и својата песна “Freed from desire”.
„Добредојдовте“, вака Вероник Бертол, заменик-градоначалничка, го започна своето обраќање до српските студенти кои трчаа кон Брисел и кои вечерта пристигнаа во Стразбур, и како што рече,пренесува Н1 .
Фото: Скриншот Н1
„Ова е втора делегација студенти што ја пречекуваме во Стразбур за помалку од еден месец. И ви благодариме! Ви благодариме што го избравте Стразбур како едно од местата каде што ќе застанете на вашиот пат за правда, демократија и крај на неказнивоста. Со тоа што го избравте Стразбур на вашиот пат, не направивте грешка, демократијата е изградена во нашиот град и се брани во него. Ви благодариме што истрчавте овој пат, повеќе од 1.400 километри, потсетувајќи нè дека сите сме жртви на корупција и судир на интереси, без разлика каде живееме, дури и граѓаните на ЕУ, ви благодариме што ги разбивате стереотипите на младите луѓе – дека се апатични и не се заинтересирани за политика. Вие сте спротивното од тоа и тоа е лекција за сите нас, и искрено се надевам дека ќе ја добиете Нобеловата награда за мир, бидејќи ја заслужувате“, рече Бертол.
