Рочиштето за случајот на СЈО „Транспортер“ во кое првообвинет е градоначалникот на Битола во заминување Владимир Талески е одложено за 6 ноември откако адвокатите на Талески доставија нови докази кои се уште не се споени со предметот.
Талески не сакаше да ги коментира новите докази и само изјави дека обвинението е политичко.
– Во нашето работење нема криминал, работиме законски, ако сме грешеле ние, грешеле сите општини во Македонија. Едноставно, законската обврска што ни е дадена ја извршивме максимално чесно и законски, што значи обезбедивме слободен превоз на ученици под условите кои дојдоа со почитување на законите во Република во Македонија. Изминативе години Битола има поевтин превоз и од Струмица и од Куманово. Ова обвинение против мене е политичко, изјави тој.
За денеска беше закажано првото рочиште за случајот, а со судскиот совет ќе претседава судијката Лидија Петровска, која го води и случајот за бегалецот Горан Грујевски, екс началникот на Петтата управа во МВР, „Тврдина 2“, за уништување на документацијата.
СЈО кон крајот на април поднесе обвинение за овој случај, но поради фактот што дел од обвинетите одбивале да ги примат поканите, судењето е закажано за септември.
Обвинението е за злоупотреба на буџетски пари во вредност од 360.000 денари поради незаконски организиран автобуски превоз.
Талески, како и претседателот на Комисијата за јавни набавки, кои во договор со директорите на училиштата и раководните лица на неколку превозни компании се обвинети дека организирале превоз за учениците во општината.
СЈО за 11 лица достави предлог за притвор, а беше побарана и забрана за располагање со имот ,како и конфискација за 3 стана, 6 патнички возила и 33 автобуси.
Минатата година, Кривичниот совет на Основниот суд Скопје 1 му изрече на Талески домашен притвор, кој два пати беше продолжуван.
По три месеци, Апелацискиот суд во Скопје ја укина оваа мерка и досуди поблага мерка на претпазливост.
Минатиот месец Битолското обвинителство отвори нов случај „Транспортер 2“, каде Талески повторно се сомничи за злоупотреба на службената положба и грабеж на општинската каса, со незаконски тендери за превоз на ученици во учебната 2013 – 2014 и 2015- 2016 година.