Движењето Беса кое викендов го избра Африм Гаши за претседател на конгресот во Тетово  го обвинува поранешниот лидер Билал Касами за фалсификат и најавува кривична пријава против него.

На денешната прес конференција Орхан Муртезани, најави дека во наредните денови на неколку прес-конференции ќе го обелоденат како што го нарекоа „мега-скандалот кој го направил поранешниот претседател на Движењето, фалсификувајќи ги документите на Беса во судот и поднесувајќи документи кои тој ги напишал дома или кои му ги имаат напишано тие кои го порачале расколот, додека тој ги испратил во судот како тие да се официјални документи на Беса“.

https://www.youtube.com/watch?v=WBMLiM2WuPM

-Првата седница на тогашниот Централен совет на кој беше изразено незадоволство кон Билал Касами се одржа на 24 декември 2017. Ова седница беше свикана од мнозинството на членовите на Централниот совет со собирање на потписи на ден 21 декември 2017 година. Во меѓувреме, Касами на 15 ноември и 4 декември поднел во судот фалсификувани имиња на претседателите на ограноците, тврдат од Беса.

 

Според нив, во Боговиње за претседател на огранокот бил избран Шпенд Тахири, но Касами во судот го поднел името на Нуредин Деари како претседател на овој огранок. Вакви примери тие наведоа и за Ресен, Струга и скопските општини Шуто оризари и Карпош.

-Иако Движењето БЕСА имаше двајца членови на Централното претседателство од Ресен, Кастриот Реџепи и Аријанит Хоџа, тие не успеа да ги најдат ниту десет луѓе за да основат огранок таму. Меѓутоа ова не му пречело на Касами во судот да го поднесе името на Аријанит Хоџа како фиктивен претседател на огранокот на Ресен. Во Струга избран претседател на огранокот бил Риат Абдурахмани, но како што изгледа Билал Касами не му верувал, па во судот како претседател на огранокот на Струга го поднел името на Нусрет Зиба, дојден од НДП. Во Шутка претседател не огранокот на Движењето БЕСА, и тоа  избран во присуство на Билал Касами, беше избран Арсим Емини, меѓутоа Билал Касами во судот го поднел името на Мухамед Цури. Во Карпош, претседател на огранокот беше избран Јонуз Фејзулаху, додека Билал Касами во судот го поднел името не Илир Хоџа, обвинуваат од партијата.

Тие велат дека овие податоци се пријавени и во органите на правдата и тој ќе се соочи со кривична пријава за фалсификување на документите и службените акти на Движењето БЕСА.

Реакција на Касами: Поднесовме пријави за злоупотреба на симболите на Беса

Кусо по објавените обвинувања за фалсификат, крилото на движењето Беса што го предводи Билал Касами објави реакција, во која вели дека „нема да се занимава со клеветите на Орхан Муртезани и неговите шефови од пајажината на невладини сомнителни организации“.

-Сите структури на Движењето Беса се фокусирани во делот на организирање на првиот Конгрес на партијата и нема да губиме енергија со секоја клевета што се обидуваат да направаат платени полтрони кои работат за све само не за интерес на Албаниците во Македонија, велат од ова крило на Беса. Тие велат дека ангажирале адвокат кој веќе доставил неколку предмети во обвинителство за Орхан Муртезани и за тие што како што велат „го придружуваат него и тоа за клевети, лажни наоди и злоупотреба на симболите на Движењето Беса“.