Судот му го одзеде пасошот на битолскиот градоначалник Владимир Талевски, првосоомничен во случајот „Транспортер“ што го води Специјалното јавно обвинителство. Ваквата мерка следува по двочасовниот распит на Талевски пред судија на претходна постапка во Кривичниот суд во Скопје. Судијата го одби предлогот на СЈО да му одреди мерка притвор, по што Специјалното обвинителство има рок за жалба од 24 часа до Кривичниот совет во судот.
Талески денеска во судот беше придружуван од адвокатот Никола Додовски кој воедно е и адвокат на Никола Груевски, а обвинителите во судот донесоа кутии со докази.
Тој е еден од осомничените во случајот Транспортер, во кој 22 лица се товарат за незаконски тендери за транспорт на учениците од училиштата во регионот на Битола.
Истрагата опфаќа вкупно 81 криминално дејствие, спротивни на Законот за јавни набавки и Законот за средно и основно образование, а освен градоначалникот осомничени се уште 22 лица за злоупотреба на службената положба и проневера на пари.
За Талески првично од СЈО бараа само конфискација за дел од неговиот имот, бидејќи и тој се најде на листата на помилувани од Иванов.
По укинување на аболицијата, СЈО побараа мерка притвор за него.
Случајот со превозот на учениците, беше споменат и во 19. „бомба“ на опозицијата, во која министерот за финансии Зоран Ставрески во разговор со екс-министерката за внатрешни Гордана Јанкулоска, споменува дека битолскиот градоначалник за превоз на учениците склучил договор „коруптивен до даска“ со цени десет пати повисоки од предвиденото.