Нема одложување на изборите за ново раководство во Лекарската комора. Основниот суд Скопје 2 не донесе времена мерка за одложување и одговори негативно на тројцата лекари кои поднесоа тужба до граѓанскиот суд и бараа да се одложат изборите за да се поништи новиот статут по кој треба да се спроведуваат. Лекарите најавија дека ќе ја обжалат оваа одлука на граѓанскиот суд.
„Ќе ја обжаливме одлуката, изборите се одвиваат во сите градови во државата. Денеска на гласањето во Тетово е избркана нашата претставничка со полиција. Тоа е докторка која с е наоѓа на листата и требаше да седи таму да ја следи регуларноста на гласањето. Но, од Лекарската комора стигнала наредба да ја тргнат од таму“, изјави за НОВА, Лилјана Чолакова Дервишова член на сегашниот извршен одбор на комората.
Гласањето се одвива во сите градови во државата, започна во седум часот наутро и ќе трае до 19 часот кога ќе бидат затворени гласачките кутии. Се избираат 20 делегати. Во понеделник најверојатно ќе има конститутивна седница на Собранието по што ќе се избира претседател и новото раководство.
„Ние реагиравме на Статутот кој беше донесен со двотретинско мнозинство и си го направија според нивните потреби. Според овој Статут, заменикот си го назначува ново избраниот претседател самиот“, вели Чолакова Дервишова.
Како што веќе објави НОВА, Лекарската комора цела година ги одлагаше изборите за нов претседател. Тројцата лекари поднесоа тужба заради така изгласаниот Статут, а Чолакова Дервишова обвини дека е донесен незаконски, исто како и донесените правилници и закон за доктори.
Таа вели дека со новиот статут кој е изгласан набрзина, мандатот на претседателство е неограничен наместо со два мандата како до сега.
Статутот забранува во извршните тела да членуваат претседатели на лекарски здруженија, кои се всушност најинформирани за витални прашања на лекарите од внатрешноста. Чолакова Дервишова побарала отчет и транспарентност во деловниците кои ги прогласиле за тајна, по што и биле затворени вратите на комората. Најголемиот конфликт избил кога реагирала на масовните вработувања на блиски роднини на првиот човек на комората и неговите заменици. По ова, таа била дадена на судот на честа, по што следувала и тужба.