Јавниот обвинител Јовески да си погледне во сопствениот „двор“ – му напиша Судот на Обвинителот кој вчера ја критикуваше ослободителната пресуда за Латас и неговите браќа. Судот ги нарече обвинувањата „паушални.
„Во однос на вчерашната изјава на Јавниот обвинител , Кривичниот суд укажува на обвинителството наместо редовно и неосновано да го напаѓа судот и судиите после секоја судска одлука од која не се задоволни, да си погледне во сопствениот „двор““ пишува во писмената реакција од Судот.
Од Судот исто така наведуваат дека „ судиите работат согласно Законските одредби, го почитуваат начелото на еднаквост на оружјата, Уставно загарантираните права и слободи и одлучуваат врз основа на доказите и аргументите, а не врз основа на лични желби на странките во постапката, а секоја првостепена одлука на Кривичниот суд се преиспитува од повисоките судски инстанци, по изјавена жалба од незадоволната страна“.
„Како суд бараме во иднина обвинителството да се однесува со повеќе почит кон судиите и судиската функција, нивните коментари и изјави да се во рамки единствено на нивните надлежности, а не на паушални обвинувања“ коментираат од Судот.
Јавниот обвинител Јовески вчера рече дека поддржува ветинг во судството и обвинителството, и го посочи примерот со ослободителната пресуда за новинарот Дрган Павловиќ Латас и неговите браќа за кои СЈО имаше поднесено обвиние за бесправно градење. Тој побара и Судскиот совет да го истражи овој случај.
„Мислам дека на такви судии не им е местото во правосудството и веројатно Судскиот совет ќе треба по соодветна постапка да го испита тој дел. Јас после објавувањето на пресудата барав и судска пракса. Судската пракса во однос на овие кривични дела е сосема јасна, таму не се бараат ниту записници од инспектори, ниту дали некој пријавил. Доволно е лицето да почне да гради без одобрение за градба“ одговори јавниот обвинител Љубомир Јовески на новинарско прашање на прес конференцијата за истрагата која се води против Боки 13 и Зоки Кичеец.
Тој напомена дека ветингот ќе помогне во „обвинителството и судството да останат само чесните, тие што се борат за правдата, што имаат неселективна примена на законот, јавни обвинители и судии со свој интегритет“.
Латас и неговите браќа добија ослободителни пресуди за изградба на трите викендички во Зелениково кои според СЈО се граделе без дозвола. Судијката рече дека ги ослободува затоа што „во овој случај никој од државата не презел никакви мерки додека се граделе објектите ниту било донесено решение за отстранување на градбита – со што се докажува дека немало јавен интерес“.