Судија на претходна постапка одби да определи мерки на претпазливост за осомничените алфи во случајот Тортура на Специјалното обвинителство и предлогот го оцени за неоснован.
-Судот не го прифати предлогот на СЈО, а со тоа и не им определи мерка на претпазливост – забрана за вршење на сите полициски овластувања кои осомничениот ги има како полициски службеник и конкретни забрани за вршење на работи и работни задачи и овластувања кои ги има согласно актите за систематизација, се вели во соопштението на Основен суд Скопје 1.
Случајот „Тортура“ кој го покрена Специјалното обвинителство се однесува на нечовечно постапување при апсењето на лидерот на Обединети за Македонија, Љубе Бошковски.
Првоосомничен е поранешниот шеф на УБК, Сашо Мијалков, но тој не е дел од постапката бидејќи кога се отвори предметот за него важеше аболицијата од претседателот Иванов.
Второосомничен е Ивица Анчевски – Пуки, актуелен командант на единицата Алфи и уште петмина полициски службеници.
Против сите осомничени лица вработени во МВР СЈО побара предлог мерка на претпазливост, забрана за преземање на определени работни активности кои се поврзани со кривичното дело.