Судскиот совет денеска преку соопштение извести дека судијката Татјана Михајлова, в.д. претседателка на Кривичниот суд поднела неотповиклива оставка. Од Советот најавуваат дека ќе направат анализи за да се реши настанатата ситуација.
„Во текот на денешниот ден Судскиот совет на Република Македонија ќе преземе мерки за адекватно решавање на настанатата ситуација, ќе бидат извршени анализи и во најкраток можен рок ќе биде закажана седница по повод поднесената оставка на в.д. претседателот на Основен суд Скопје 1 Скопје“, пишува во соопштението на Судскиот совет.
Причините за оставката на Михајлова, засега не се познати. Ваквиот потег следи откако повеќемина судии поднесоа жалби до Врховниот суд во врска со годишниот распоред кој го изготви токму Михајлова, со кои тие без консултација беа прераспоредени на нови работни места. Неодамна на седуммина од осумте судии, Врховниот суд им ги прифати жалбите и ги врати на нивните стари работни места.
Михајлова ја извршуваше функцијата в.д. претседател на кривичниот суд, откако на поранешниот претседател Владимир Панчевски му истече мандатот на 4 декември минатата година, но тој сега повторно се кандидира за истата позиција.