Неодговорното работење на претходната влада ќе ги чини граѓаните уште 20 милиони евра за изградба на автопатската делница Миладиновци-Шип, информираше денеска на прес-конференција министерот за транспорт и врски Горан Сугарески.
Тој рече дека еден месец пред истекот на рокот во кој требаше да биде готов автопатот Миладиновци- Штип, поранешниот министер за транспорт и врски Владо Мисајловски ја информирал владата дека треба да се склучи Анекс на основниот договор за да се продолжи рокот за изградбата на автопатот.
Според информацијата која Министерството за транспорт и врски ја доставило до владата, изградбата е завршена само 68 отсто.
Како причини за продолжување на рокот наведени се: појава на свлечишта, дислокација на далноводи, преместување на цевководи, дислокација на водоводни мрежи и уште неколку десетина причини. Исто така во информацијата доставена до владата, наведено е дека треба да се направи и дополнителна експропријација на земјиштето. Потребниот рок за да се заврши делницата, според Анексот е до мај 2018 година.
„Целата оваа инвестиција е со многу пропусти, а дополнителните средства кои најверојатно ќе треба да се платат од буџетот се околу 20 милиони евра. Но сакам да потенцирам дека ние ќе ги надминеме и решиме проблемите со кои се сретнуваме, а кои настанале поради неодговорното работење на претходната влада. Автопатите, и овој и онаа делница Кичево- Охрид ќе бидат завршени“, рече Сугарески.