Никакви кампови ниту станови за мигранти и бегалци нема да се градат во Македонија, истакна денеска министерот за транспорт и врски Горан Сугарески одговарајќи на новинарско прашање.
Според Сугарески, наводната изградба на станови и кампови за бегалци е манипулација на опозициската ВМРО-ДПМНЕ во пресрет на локалните избори.
– Се е во замислата на опозициската ВМРО-ДПМНЕ за да направи манипулација со граѓаните, воедно со гласачкото тело за локалните избори и затоа се споменуваат некакви кампови и станови.Воопшто не станува збор да се градат ниту кампови, ниту станови. Тоа одговорно го тврдам како министер за транспорт и врски кој треба да ја познава темата. Ова е жестока манипулација на ВМРО-ДПМНЕ за да внесе страв меѓу населението, рече Сугарески, кој беше дел од владината делегација за чествување на делото на Блаже Конески во неговото родно село Небрегово.