На седница на Владата задутре се очекува да биде усвоена уредба за распределба на финансиии за нискобуџетни авиокомпании и по нејзино објавување во Службен весник по неколку дена ќе се формира комисија за евалуација и ќе биде распишан јавен повик за евтини летови, информира денеска министерот за транспорт и врски Горан Сугарески.
– Апелирам до сите авикомпании кои сакаат да конкурират. Во наредните денови ќе се распише јавниот повик и очекувањата се да се јават поголем број, изјави Сугарески.
Сугарески потенцираше дека на анимирање на авиопревозниците се работи пред да се објават повиците.
– Во периодот додека траат јавните повици немам никакви економски промотори кои работат во Македонија и тоа не ми е целта. Тоа го правиме предвреме, разговараме, зборуваме за деталите, но не би сакал да бидам инволвиран во тоа, наведе министерот за транспорт.
Новиот повик следи откако Министерството за транспорт и врски го поништи објавениот оглас за таа намена во јули поради, според образложението, административни пречки. На повикот аплицираше само нискобуџетната авиокомпанија „Визер“, која со два тригодишни договора од аеродромите во Скопје и во Охрид оперира на 30 дестинации кон 14 држави, со субвенции од македонската Влада.
За финансиска поддршка на евтини авиолинии за наредните три години се предвидени околу пет милиони евра.
Сугарески повтори дека се прават анализи за економска оправданост за формирање национален авиопревозник.
– Претходните анализи покажале дека не треба да има национален авиопревозник. Сега се прават нови анализи, се земаат предвиод компаративните искуства од Србија каде има јавно-приватно партнерство, но би почекале да завршат за да соопштиме, рече Сугарески.