Државниот пазарен инспекторат во рамки на своите редовни контроли од утре ќе прави проверка на новата цена на маслото за јадење, откако денеска поскапе и „Брилијантот“. Едно шише сега се продава за 135 денари.
Анета Димовска Симеска, директорката на Државниот пазарен инспекторат за Нова објаснува дека во продавниците може да се најде и масло за јадење од ист производител со различни цени, а тоа е така затоа што цената била креирана во зависност од тоа кога била реализирана набавката.
Токму на тоа од утре пазарните инспектори ќе го насочат своето внимание на приемните листови на набавките и ќе проверуваат дали станува збор за масло за јадење од залихи и кога тоа било набавено.
Од компанијата, „Витаминка“, пак, објаснуваат дека нерафинираното масло од Бугарија, Романија и Украина е со значително повисока цена што се одразило и врз малопродажната цена на маслото.
– Првиот квартал од годинава, Витаминка како компанија покажа одговорност поради економската криза и ја задржа цената на ниско ниво долг временски период. Претходната цена на „Брилијант“ беше 125 денари за литар, со што внимаваме и важно ни е да нема големи ценовни скокови кон граѓаните. Но, изминативе недели ситуацијата се смени во однос на набавката на суровина од Бугарија и Украина, што останаа единствени алтернативни пазари за нас, велат од Витаминка.
И покрај покачувањето, цената на „Брилијант“, велат од „Витаминка“, е најниска од сите производители на масло на македонскиот пазар, а компанијата доследно ги почитува препораките и се раководи според насоките на Владата за справување со економската криза.
Новото сурово масло кое е набавено од Бугарија, Романија и Украина, чини околу 2.200 евра за еден тон, а пред три до два месеца цената се движеше од 1.200 до 1.500 евра за тон. Малопродажната цена на маслото, што е берзански производ, зависи од движењата на цените на светските берзи.
Поради увозот од Србија, кризата со маслото за јадење се смирува и нема потреба граѓаните да прават залихи, порачуваат од Витаминка.
Претхододните пресметки за зголемувањето на цената на маслото, зависно од производителот и од тоа дали станува збор за пакувања од 0,8 литри, 0,9 или еден литар, најавуваа дека таа може да се движи најмногу до 110 денари. Директорот на фабриката „Брилијант“, Коста Ташков објасни дека поскапувањето е резултат на зголемувањето на цената на суровината и дека со новата цена, маслото за јадење од овој производител се изедначува со цената на останатите производители во земјата.
Проценките на набавувачите во однос на тоа дали ќе има нов бран поскапувања на маслото за јадење се дека би требало да се стабилизираат цените пред се поради увозот од Србија, но дека е многу важно граѓаните да ги прифатат апелите да не се прават залихи непотребно.
Според податоците на Државниот завод за статистика, индексот на трошоците на животот во март 2022 година, во однос на претходниот месец, изнесува 101.6, а индексот на цените на мало изнесува 101.5. Поскапувања во однос на претходниот месец биле забележани кај млекото за 7.3 отсто, кај јацата за 6. отсто, потоа кај свежото овошје за 5.9 отсто. Лебот и житата поскапеле за 5 отсто. Маслото и масните производи поскапеле за 1.7 отсто, покажуваат анализите на статистика.
Според анализите на ССМ, пак на едно четиричлено семејство за да го помине месецот му требаат над 35.000 денари од кои само 15.000 за храна и пијалоци.
С.М.